الجمعة، 10 يوليو 2015

لا نعلم !!

    • 7/9, 11:27pm

      يعني أنت شايف أن المثليين مش أسوياء ؟
    • 7/9, 11:27pm

      الفكرة بقى اني لو اتعرضت وقتها حد هايقولي مادام هم في سريرهم مش من حقك تعترض
      مش عارف
      الفكرة ان الدين بيقول ده حرام
      بس ياترى حرام وهم مش اسوياء
      ولا حرام زي شرب الخمر ؟
    • 7/9, 11:29pm

      هنعرف إزاي ؟
    • 7/9, 11:29pm

      العلم هنا يتدخل
      يعني انا ممكن اعتقد ان سبب التحريم هنا عدم الخلفة وتأثيره على المجتمع
      بس دي هاتبقى نظرة قاصرة ليا وانا ببص على الدين
      لانه زي ان الزنا حرام علشان اختلاط الانساب
      طب لو واحدة عاقم او ست كبيرة وصلت لسن اليأس
      المفروض وقتها ده حلال
      بس لسه حرام
      في حاجة مش واضحة لينا
    • 7/9, 11:33pm

      أيوه
    • 7/9, 11:44pm

      احنا وصلنا لمرحلة ان الصح والغلط بقى أمر راجع لك العقاب خلاص من السهل إنك تتحايل عليه ---------------------------------------------------------------------------------------------- N.B. العلم هنا يتدخل في كونهم أسوياء ولا لأ ملهاش دعوة بالحلال أو الحرام

السبت، 15 نوفمبر 2014

الإنتقام البسيط

بتلذذ أوي بمنظر الناموسة وهي غرقانة في الدم على إيدي بعد ما أقتلها 
تشرب شوية من دمك وبدل ما تكتفي بيه وتطير
لا ، تفضل قاعدة وتمص وتشرب أكتر لغاية ما تصاب بالتخمة
أقوم أنا أقتلها ، علشان تعرف إن الطمع وحش
الطمع وحش يابني أدم

الاثنين، 8 سبتمبر 2014

الشك و "Reaction Formation"


الواحد من كتر ما هو بيفكر في موضوع ما وبيوصل لنتايج متناقضة

بدأ يشك إنه بيخوض فترة الـ"Reaction Formation"
بيعتقد حاجات هو مش عايزها
بس المصيبة الأكبر إن النتايج اللي بتوصل ليها ممكن تكون صح
لكن لسه ماوصلش لنقطة ترابط بينهم - الصورة الأكبر -
فمن هنا يبدأ الشك يستغله ويحاول يبينه إنه النتايج دي غلط , ومش كده بس , بل ممكن يحاول يشككه في طريقة تفكيره من الأساس
واستغل معرفته للمعلومة دي "Reaction Formation" كمدخل لأغراضه الدنيئة
.....


Reaction Formation : It's doing the opposite of it really felt unconsciously.
A mother may be over protecting to her unwanted child. 

الاثنين، 4 أغسطس 2014

#ASK : إزاي بتقدر تسعد نفســـك ؟ بحاجات بسيطة ؟

إزاي بتقدر تسعد نفســـك ؟ بحاجات بسيطة ؟

انتحر مثلاً
- بس الأنتحار حرام
طيب أقتل الناس كلها
- برده حرام
طيب أنا عرفت الحل , ومش حرام
- إيه ؟
أتعلم فيزياء وعلم الفضاء واشتغل في ناسا واكتشف كوكب يصلح للحياة عليه 
وادعي مجموعة من الناس واقنعهم يروحها يعيشوا هناك 
ولو نجحت الفكرة وقدروا يعيشوا , هابعتلهم باقي كوكب الأرض 
وأعيش هنا للوحدي 
كوكب الأرض ملكي يا كلاب
- O.o , بس كده مش حاجات بسيطة !!
طيب انا عندي فكرة تانية 
هاعيد استنساخ هلتر وأجيبه يعمل فكرته عن التطهير العرقي وسيادة الجنس الآري وتفوقه.
بس انا هالعب في دماغه وابقى انا الجنس الآري الوحيد
وأخليه يخلص على كل الناس 
لحد ما نبقى انا وهو بس 
وفي الآخر يكتشف انه من جنس آري فيقتل نفسه 
وأعيش لوحدي على كوكب الأرض
بس هايبقى في مشكلة 
- إيه ؟
الجثث هاتملى المكان 
فأنا أقوم مخترع "wall-e" ينظف لي المكان
وأعيش برنس

الأحد، 3 أغسطس 2014

المرضى يُنسون ، من يبقى خالداً هي الأمراض

لا تصبح وغداً للأبد يا صديقي ، الأوغاد مثيرون للشفقة ..
كذلك المرضى ، لا شرف في كونك مريضاً على الإطلاق
لن تُعد بطلاً إذا مُت من المرض
لن تُعد بطل إذا قاومت الآلام وتوجعت في النهاية
لن تُعد بطلاً ياصديقي على أي حال كان
ستموت ..
ستموتُ ذليلاً  ..
وإن لم يكن من المرض ، فسيكون بنظرات الإشفاق
تذكر يا صديقي ، المرض معركة
ستحارب كائناً لا تراه بعينيك 
فمهما بلغت من قوة لن تستطيع إيقاف ضرباته المباغتة إلى الأبد
وسينتهى بك الحال طريح الفراش ، مثيراً للشفقة ، تنتظر أجلك
تلك المعركة المحسوم أمرها قبل بدأها ، أترغب في خوضها ؟!

الأحد، 25 مايو 2014

عربية عم حسين

مروح امبارح وراكب عربية بتوصلني من السلم لحد البيت
فالمهم كنت راكب , أنا في الكنبة اللي ورا وعم حسين السواق وست عجوزه جنبه
ويشغل عم حسين الراديو ونسمع أغنية بشرة خير ويبدأ عم حسين بالشكر فيها ويوصف قد إيه هي جميلة والست اللي جنبه بتأيده
وفجأة ألاقي الست بدأت ترقص في العربية
مشهد غريب بيحصل قدامي وانا مش متسوعب ومتنح , أي نعم سبق لي أن سمعت وشوفت فيديوهات عن النوع ده , لكن تقابلهم وجه لوجه - أو في حالتي وجه لقفا - حاجة تصدم
وشويه ينضم للملهى الرقصي اللي ماشي ده ثلاث أشخاص
لتصبح العربية فيها 6 أشخاص
عم حسين وشخص معاه في مقعد السائق
الست الراقصة في مقعد جنب السائق
و3 في الكنبة الخلفية وأنا بتوسطهم
(( أوعى تستغرب 6 أشخاص في عربية مش زحمة زي ما أنت متخيل
لو كنت معايا من يومين كنت هتلاقيني أحد التمن أشخاص الراكبين في الكنبة الأمامية في الميكروباص الخارج من القصر العيني المتجه للمنيب
ام وطفليها الاتنين على يسارك - طفل على حجرها وطفل آخر جنب الشباك قاعد على طرف الكنبة مفعوص وطالع عينه علشان بس تتهرب من إنها تدفع له كرسي
وسيدتان على اليمين وبنتاهما الاثنتان على حجرهما
ومفروض منك تخلي مكان بينك وبينهم علشان ماتلمسوهمش , شايف بقى عربية عم حسين وسعة قد إيه !! ))

نرجع بقى للعم حسين
مازال عم حسين قاعد يبين مواطن الجمال في الأغنية
لحد ما انضم إليه اللي قاعد جنبه وبدأ يجمل ويعظم في السيسي وقد إيه إنه قائد عظيم ولم يخلق مثله وبتاع , موجهاً كلامه للي على يميني - نسيت أقولك إنهم أصحاب -
ولما اكتشفت السيدة العجوز إنه قاصد السخرية بكلامه , بدأت تشتم في الأخوان
وعم حسين قاعد يمدح في شعب مصر وإنه أحسن شعوب العالم
فما كان من الراجل الإ إنه واصل سخريته وفضل يوافقها على ان الاخوان هم السبب
وأخرج لسانه ليستهزأ بالعجوز أكتر وصديقه مستمر في الضحك
وفجأة لقيت الشخص اللي على يساري أنفجر وبدأ يتكلم بشده ويقول أيوة السيسي قاتل وأمن الدولة راجع والدم هايبقى أكتر
ويوقفه الشخص الساخر بكلامه بأن آمن الدولة عمرها ما أذيت حد و دي حاجة كيوت وكده
*وأنا قاعد في النص متابع بصمت وهأموت وأضحك بسبب المسرحية اللي بتحصل قدامي"
وبينما وهم بيتكلموا يغلط اللي على يساري في الدين علشان يوضح النفخ اللي هايحصلنا في المستقبل
----------
*هنا بقى دار حوار في بالي :
- لازم أسكته ده غلط في الدين
ياعم على أساس هايفهموا , انت مش شايف اللي بيحصل قدامك ؟!
- الدين مش بتاعهم علشان يغلطوا فيه"
----------
وهنا قررت أتدخل وأسكتهم وبدأ كلامي :
بعدين عن كل حاجة أنا مليش دعوة بالسياسة والهبل ده , لكن أنك تغلط في الدين يبقى تسكت -وبدأت أوضح شناعة غلطته دي وإنها تعتبر شرك أصغر واستهزاء بالدين -
وهو عمال يبدي في مبررات من أن الكلمة طلعت غصب عنه وإنه مش قاصد
ويقف عم حسين وينزل الست العجوز والساخر وصاحبه
و يختم الساخر دوره في المسرحية بكلمة "ما الراجل قالك استغفر الله  ,الدين رحمة" ويغادر
وهنا انفعلت وزاد غضبي أكتر (( ماهو بسبب الأشكال دي الدين بيفقد قيمته ويبقى خانة في البطاقة مش أكتر ))
ومازال اللي جنبي قاعد يبرر وإنه قال كده علشان الساخر استفزه وطلع لسانه للست فهو ده كان قصده يسخر منه هو كمان
- يعني هو مع السيسي بس كان بيسخر من الأخواني اللي كان عامل نفسه تبع السيسي علشان يسخر من الست اللي كان بترقص اللي هي مع السيسي , فهمت ؟! -
وعم حسين يتدخل ويحاول يبرر هو كمان
وانا برده لسه مُصّر إن اللي عمله شيء فظيع وأقول مش مبرر
والمبررات عماله تتوالى لدرجة أني حسيت إنهم بيطلوا العفو مني وأن كلمة "خلاص ماحصلش مشكلة" اللي هاقولها دي هاتغنيهم عن الحساب
وبعد ما روحت لقيت إن العربية دي شبيه بالبلد
من ناحية التفكير وأن كل واحد فاكر إنه أنصح من التاني
ومن ناحية الأخلاق اللي في انحدار مستمر
ومن ناحية الدين اللي كل واحد بيصنع منه دين جديد علشان مزاجه
------------
العبر المستفادة :
* ماتركبش ما ناس كبيرة لوحدك وخصوصاً لو منهم ست
* لو العربية مشغلة راديو أنزل
* ما تخليش حد يلغط في الدين لو في التفاصيل حتى
* ما تغلطش زيي وتنسى تقول "يا أخي أحا"

#بشرة_خير
#عربية_عم_حسين

الجمعة، 16 مايو 2014

لست بقاضي


لنتفق سوياً أنه لا يجوز بأي شكل كان أن يكون الإله ظالم 
كيف من الممكن أن يفنى المرء عمره في عباده إله يعتقد بظلمه ، وكيف سيثق به بأن يترك ظلمه ويحسابه حساباً عادلاً ليدخله الجنة ؟!
فأذا كنت تعبد إله وتعتقد بظلمه فهناك خطأ ما
إما في ذلك الإله ، أو في طريقة نظرتك وعبادتك له ..
ربنا قال في الحديث القدسي :
(( ياعبادي إني حرمت الظلم على نفسي وجعلته بينكم محرماً فلا تظالموا ...))
وقال في كتابه الكريم :
{وَلَا تَزِرُ وَازِرَةٌ وِزْرَ أُخْرَى}
فعند سماعك لحديث مثل "من زنى زني به ولو بحيطان داره"
لا تحتاج للبحث لتدرك عدم صحته
فربك ليس بظالم وليس بذلك الضعف الذي يمنعه من عقابك ليلفت إلى أقرب الناس إليك
وليس من الضرورة أن ترى تلك النهاية الموحشة لذلك الظالم على أرض الواقع كما يصوره المخرجين والأشخاص المتخصصين بفبركة الحكايات على مواقع التواصل ..
متى سيدرك البشر أن الله ليس في حاجة إليهم ليحقق شريعته ودينه في الأرض !!